Stefna skólans og áherslur í námi

Það er gaman í skólanum!

Í Hörðuvallaskóla einkennist nám og kennsla af áhugaverðum og markvissum verkefnum. Samþætt þemanám og leiðsagnarnám er orðið hluti af starfi skólans í 5.–7. árgangi og er stefnan að það verði hluti af öllu skólastarfi. Nemendur hafa tækifæri til að hafa áhrif á nám sitt og eiga gagnrýna samræðu um það. Nemendur eru meðvitaðir um hvert er stefnt og fá markvissa endurgjöf frá kennurum á leiðinni.

Einkunnarorð skólans eru: Það er gaman í skólanum! Einkunnarorðin eru útskýrð betur hér að neðan.

Framtíðarsýn

Í Hörðuvallaskóla er sterkt og gott skólasamfélag. Nemendur skólans fá tækifæri til að rækta styrkleika sína og við viljum útskrifum ábyrga, sjálfstæða, sjálfsörugga og samskiptahæfa nemendur. Skólinn er eftirsóttur vinnustaður fyrir nemendur og starfsfólk og nýtur álits fyrir framsækið og þróttmikið starf. Samskipti innan skólans eru uppbyggileg og einkennast af gagnkvæmri virðingu. Markvisst er unnið að því að efla og bæta skólabrag og skólamenningu þannig að allir nemendur fái að vera þeir sjálfir, öruggir og lausir við áreitni.

Það er gaman að læra í Hörðuvallaskóla

Nemendur fást við verkefni sem eru krefjandi, fjölbreytt og taka mið af margvíslegum styrkleikum einstaklinganna.

Áhersla er á lestur og læsi í víðum skilningi. Lestrarstundir eru daglega á báðum stigum. Allir nemendur lesa heima á hverjum degi með aðstoð og aðhaldi frá foreldrum. Byrjendalæsi er ráðandi kennsluaðferð á yngra stigi og Læsi fyrir lífið í eldri bekkjum. Einnig er notast við aðferðir K-PALS sem byggja á hljóðaaðferðinni. Fylgst er með framvindu í lestrarnámi nemenda með reglulegu mati og stuðningi þar sem með þarf samkvæmt læsisstefnu skólans.
Áhersla er á stærðfræðinám. Verkefnamiðuð viðfangsefni í stærðfræði eru nýtt til að glæða stærðfræðina lífi og tengja hana við daglegt líf. Lögð er áhersla á að skapa og viðhalda jákvæðu viðhorfi og áhuga nemenda til stærðfræðinnar m.a. með hlutbundinni vinnu og með því að gera nemendur meðvitaða um áhrif stærðfræðinnar á daglegt líf og tengsl við umhverfið.
Áhersla er á nýtingu upplýsingatækni í námi og kennslu enda er hún eðlilegur þáttur af skólastarfinu. Forritun er hluti af námi innan skólans.
Áhersla er á að nemendur taki virkan þátt í áætlanagerð og markmiðssetningu í náminu og hafi áhrif á val viðfangsefna. Upplýsingatækni er markvisst nýtt til aðlögunar náms að hverjum og einum.
Námsmat einkennist af leiðsagnarmati og allt námsmat miðast við að hvetja og leiðbeina nemendum.
Áhersla er á sköpun með öflugri list- og verkgreinakennslu og í öllu námi nemenda. Nemendum er gefinn kostur á að nýta áhugasvið sín í náminu.
Áhersla er á gott samstarf við foreldra þannig að þeir geti sem best stutt við nám barna sinna.

Það er gaman að vaxa og þroskast í Hörðuvallaskóla

Samskipti innan skólans einkennast af gagnkvæmri virðingu. Skólinn ýtir undir alhliða þroska nemenda með áherslu á samskiptahæfni, nærgætni, tillitssemi, lýðræði og heilbrigði.
Nemendur taka þátt í bekkjarfundum a.m.k. vikulega þar sem þeir þjálfa samskiptahæfni og dómgreind sína í samstarfi við aðra og læra lýðræðisleg samskipti og ákvarðanatöku. Þannig lærum við að umgangast hvert annað af virðingu og velvilja.
Áhersla er lögð á uppbyggileg viðfangsefni og samskipti í frímínútum. Þar æfast nemendur í að leika sér saman á friðsamlegan hátt, leysa úr deilum, fara eftir fyrirmælum, virða leikreglur o.fl.
Nemendur efla hreyfiþroska sinn og fá útrás fyrir hreyfiþörf sína á hverjum degi.
Nemendur hljóta þjálfun í núvitund og hún er hluti af starfi þeirra.
Nemendur fá tækifæri til að hafa áhrif á skólastarfið á ýmsan hátt og koma sínum skoðunum og hagsmunum á framfæri, m.a. með bekkjarfundum, virku nemendaráði, rýnihópafundum og reglulegum skólaþingum.
Allir aðilar skólasamfélagsins hafa í huga að mistök eru eðlilegur hluti af lærdóms- og þroskaferli, þau eru frábært tækifæri til að læra og við leitumst við að nýta þau til þess.

Það er gaman að starfa í Hörðuvallaskóla

Starfsfólk Hörðuvallaskóla er metnaðarfullt og ber hag nemenda fyrir brjósti. Það leitast stöðugt við að bæta skólastarfið og gera góðan skóla enn betri. Stuðst er við gögn og rannsóknir í því skyni að bæta skólastarfið.
Starfsfólk skólans vinnur náið saman og deilir ábyrgð í starfi.
Allir starfsmenn eiga sér samstarfshóp og stjórnanda sem þeir geta leitað til.
Starfsfólk vinnur saman að því að vaxa í starfi og bæta sífellt skólastarfið. Allir starfsmenn hafa aðkomu að veigamiklum ákvörðunum um skólastarfið.
Mannauður skólans er virkjaður þannig að styrkleikar starfsmanna nýtist sem best.
Áhersla er á öfluga starfsþróun og starfsfólk á kost á valkostum og stuðningi í þeim efnum.
Aðstaða og búnaður er jafnan eins og best gerist.

Þessi síða var uppfærð í október 2024