Fréttir

Skáksveit Hörðuvallaskóla vann öruggan sigur á Íslandsmóti grunnskólasveita sem fram fór um síðastliðna helgi, í húsnæði Taflfélags Reykjavíkur. Sveitin hlaut 26½ vinning í 28 skákum og þetta er þriðji Íslandsmeistaratitill Hörðuvallaskóla á jafn mörgum árum. Skáksveit Íslandsmeistara Hörðuvallaskóla skipuðu: Vignir Vatnar Stefánsson, Stephan Briem, Arnar Milutin Heiðarsson, Sverrir Hákonarson, Benedikt Briem og Óskar Hákonarson. Það er því ljóst að sveit skólans er á leið á Norðurlandamót í Finnlandi í haust.

Menntaráð Kópavogs auglýsir hér með eftir tilnefningum til viðurkenninga fyrir framúrskarandi skólastarf í grunnskólum Kópavogs. Viðurkenningar verða veittar fyrir 3 – 5 verkefni sem stuðla að nýbreytni og framþróun innan skólanna. Með því er átt við nýjungar í skólastarfi eða þróunarverkefni sem fela í sér umbætur eða leiða til framfara í skólastarfi. Auk þess er æskilegt að verkefnið sýni: – að það hefur verið unnið af frumkvæði, fagmennsku og ábyrgð. – að það hafi leitt til umbóta og/eða framfara í skólastarfi. – að það feli í sér hvatningu til eftirbreytni innan viðkomandi skóla og utan. Skriflegar tilnefningar skulu berast rafrænt á sérstöku eyðublaði til grunnskóladeildar Kópavogs til hekla@kopavogur.is eigi síðar en 27. apríl 2018.

Keppendur okkar í Skólahreysti stóðu sig með sóma og lentu í 5. sæti í sínum riðli en í honum kepptu 12 skólar. Það var Varmárskóli sem fór með sigur af hólmi í riðlinum, í öðru sæti varð Lindaskóli, Garðaskóli í þriðja sæti, Álfhólsskóli í fjórða og Hörðuvallaskóli í fimmta. Á myndinni má sjá liðið okkar sem var okkur sannarlega til sóma, þetta eru þau Telma, Óskar, Sverrir, Tryggvi Geir, Steinunn Silja og Thelma Rós.

Úrslit Pangea stærðfræðikeppninnar á Íslandi fóru fram þann 17. mars sl. Við í Hörðuvallaskóla áttum 8 keppendur í úrslitakeppninni sem var glæsilegur árangur hjá okkur fólki, en í úrslit komust 89 nemendur af landinu öllu. Að lokum fóru leikar þannig að einn af okkar nemendum náði verðlaunasæti en það var Ari Þröstur í 8. bekk sem hafnaði í öðru sæti í flokki 8. bekkjar nemenda. Innilega til hamingju með árangurinn!

Við í Hörðuvallaskóla eigum 8 nemendur í úrslitum Pangea stærðfræðikeppninnar en það er alþjóðleg keppni sem nú er haldin í þriðja skiptið fyrir nemendur í 8.-9. bekkjum á Íslandi. Í þetta skiptið tóku þátt tæplega 2800 nemendur hérlendis, 89 þeirra komast í úrslitakeppnina og við eigum semsagt 8 af þeim. Nemendur okkar sem komust í úrslit eru Ari Þröstur Arnarsson, Arnar Freyr Tandrason og Ísleifur Arnórsson í 8. bekk og Atli Christian Pálsson, Hildur Lilja Ágústsdóttir, Ingimar Ólafsson, Sverrir Hákonarson og Vilmundur Máni Þrastarson úr 9. bekk. Glæsilegur árangur hjá okkar nemendum! Úrslitakeppnin verður haldin í Menntaskólanum við Hamrahlíð 17. mars nk. Í Pangeu er lögð áhersla á að auka áhuga þátttakenda á stærðfræði og allir eru hvattir til að taka þátt, bæði þeir sem eru vanir stærðfræðikeppnum á borð við Pangeu og líka þeir reynsluminni. Keppnin er þannig skipulögð að dæmin sem lögð eru fyrir eru mismunandi erfið. Með því er vonast til að allir fái að glíma við dæmi við sitt hæfi. Keppnin sjálf skiptist í þrennt og eru fyrstu tvær umferðirnar haldnar í grunnskólunum sjálfum. Þannig geta 8. og 9. bekkingar hvaðanæva af landinu skráð sig og tekið þátt óháð búsetu. Áhersla er lögð á að allir geti lært stærðfræði og notað hana til að skilja veröldina í kringum sig betur.

Nú hafa verið valdir fulltrúar Hörðuvallaskóla í Stóru upplestrarkeppni grunnskólanna í Kópavogi sem fram fer þann 15. mars nk. Krakkarnir eru búin að vera að æfa sig í upplestri í vetur, fulltrúar voru valdir úr hverri bekkjardeild sem síðan reyndu með sér á lokahátíð þann 2. mars. Þeir tveir nemendur sem þar fóru með sigur af hólmi og verða því fulltrúar skólans eru þær Erika Líf Káradóttir og Sigrún Tinna Atladóttir. Til vara verður svo Eik Ægisdóttir.